政壇：劉鳴煒捐款城大唔撐CY

華人置業集團副主席劉鳴煒尋日代父捐出一億二千五百萬元畀城市大學，成為城大歷來最大筆個人捐款，期間佢更以「不接受訪問」來迴避自己係咪疑似特首候選人唐唐陣營嘅一分子。

咁啱代表大學收捐款嘅，正正係疑似特首候選人兼城大校董會主席CY梁振英，兩人碰面表現大方，握手之餘仲不時密斟，但會後兩人面對傳媒交代捐款一事時，劉鳴煒被問及會否撐CY選特首時，佢即時劃清界線話：「捐錢資助嘅係城大，唔係某個人，我哋睇好嘅係城大多年做出嘅成果……無論CY定係邊個做校董會主席，無論邊個做校長，我都會支持城大！」企喺隔籬嘅CY，惟有咧嘴而笑兼講咗句「非常多謝」打完場。

另外，CY已經口頭講咗話辭職，但唐唐就仲未宣布，香港術數家協會楊子東師傅預測十月四日星期二係唐唐辭職嘅吉利日子，事關辭去舊職代表新嘅開始，吉日辭職有利日後運勢。