政壇：李嘉誠父子賀曹棨森嫁女

電能實業年初由港燈集團改咗名後果然好腳頭，喜事一件接一件，股價節節上升，香港以外業務嘅盈利更創歷史新高。近日更係紅鸞星動，集團董事總經理曹棨森大千金曹蘊怡出閣，下嫁本港慈善家呂明才後人呂慶森。

呂慶森係呂興合食米世家掌舵人，亦為鷹君集團創辦人羅鷹石嘅外孫。新娘子曹蘊怡才貌雙全，早年負笈英國修讀醫科，因喜愛小朋友，其後主攻兒科，現為瑪麗醫院兒科醫生，年紀輕輕已擔任香港大學李嘉誠醫學院嘅助理教授。

婚禮喺中環聖約翰座堂舉行，晚宴就喺西九重新開張嘅Ritz Carlton筵開數十席。新郎新娘家世顯赫，唔少城中政、商、醫學界名人紛紛到賀。曹棨森係電能實業老臣子，効力超過三十年，亦喺和記地產服務過，所以長和系一眾高層包括主席李嘉誠、副主席李澤鉅、電能主席霍建寧等亦喺百忙中抽空到賀。