政壇：白鴿公文袋 鵪鶉為區選

白鴿黨同公文袋現時仲屬於民陣之內嘅團體，但實際上民陣已經號召唔到呢兩個黨，好似民陣趁住今日係替補機制公眾諮詢結束，將舉行反替補惡法大遊行，但白鴿黨同公文袋寧願鵪鶉都唔肯撐場，白鴿黨尋日仲自行搞咗個人少少嘅反替補遊行，擺明同民陣劃清界線。點解兩黨咁驚青？據聞係同區議會選舉有關。

遊行怕被狙擊損形象

其實，白鴿黨主席鐵頭仁早前嚇鬼咁話，佢哋被夾攻，區選戰情兇險。據聞，白鴿高層早排開會傾過呢個問題，佢哋發現每逢有白鴿黨員參加遊行時，通常都被一班反白鴿人士沿途狙擊，一路行一路畀人鬧，白鴿高層檢討過，認為咁樣落去，該黨既贏唔到曝光，又令黨員受辱，正所謂賠了夫人又折兵。所以有高層已經落咗柯打，除七一等大型遊行外，其餘都唔會差隻腳落去，如果撞啱認同議題，寧願由白鴿黨自己發起，少少人去都唔介意，總好過去到畀其他人騎劫。

公文袋黨魁袋巾傑都對區選唔太樂觀，據稱，佢哋唔肯埋民陣反替補遊行嘅堆，係有黨高層認為選舉臨近，仲同班激進勢力企得太近，好難建立番自己專業、理性形象。尤其係佢哋喺外傭爭居港權司法覆核案上，已大傷元氣，如果次次跟大隊遊行，黨嘅形象好容易泡沫化。所以佢哋寧願發聲明，清楚表達自己立場好過。

既然兩黨為咗選舉，連呢啲大是大非都分唔得清，有民陣人士估計今日嘅遊行，預計都係得幾百人左右。其實泛民自己鬼打鬼，一啲都唔團結，又點叫市民支持得落手呢。