全城聲討壹淫媒 餘孽勿再玩包庇

臭罌出臭草，淫賤黎出免費報，一以貫之宣淫販賤，禍害社會，結果未曾真爽先報喪，佗累爛果報銷量暴跌事小，引起全城公憤事大。淫賤黎呢次真係捉蟲咯！

嗱，逾百個教育界、社工界、家長組織及關注青少年團體尋日破天荒發表聯署聲明，嚴厲譴責《爽報》渲染色情暴力，荼毒青少年。聯署聲明有乜嘢內容？簡單啲講有五點：一，要求《爽報》停止誨淫誨盜，刪除色情內容，並停止喺學校及青少年中心附近派發；二，要求全港公屋及私人屋苑立即拒絕派發《爽報》；三，要求市民拒絕領取色情免費報，並向影視處投訴；四，去信壹淫媒譴責散播淫風，同時提醒學生切勿選取色情免費報做剪報功課；五，呼籲廣告客戶拒絕喺淫賤報章登廣告。

咁就啱嘞，對付不良傳媒，最有效嘅辦法就係徹底杯葛之，冇人睇、冇人落廣告咯喎，咪等淫賤黎自己爽死佢囉。正所謂，江山易改，淫賤難移，人哋做免費報係正正經經做，淫賤黎做免費報就一味賣弄色情，唔引起全城公憤至奇喇。呢，至尋日為止，影視處已收到一百一十幾宗關於《爽報》不雅嘅投訴，破晒香港紀錄，叮！

市民群情洶湧，投訴爆燈，唔到當局再懶懶閒。影視處話喎，該處已就《爽報》嘅投訴作出調查，並將懷疑違反《淫褻及不雅物品管制條例》嘅物品送交淫審處評定類別，現正等候結果。不過咁，調查還調查，當局會唔會依法辦事，儆淫除奸，實在令人懷疑。

太一叮咁講唔係無的放矢o架，事關港英餘孽一向親疏有別，包庇淫媒，打壓正義，唔止雙重標準，直頭係三重標準添吖。好似Kelly Brook事件咁，刊登同一輯性感照片，《東方日報》及《太陽報》被評為二級不雅，爛果報就被評為一級非不雅，而有本喺香港出售嘅外國雜誌甚至連評級都慳番。更離譜嘅係，壹淫媒違反淫褻條例過百次，次次都被輕輕放過，就算罰款，都係雞碎咁多，咁仲唔係包庇淫媒？

人在做，天在看，咪話太一叮唔提醒，眾怒難犯吖，影視處及淫審處今次夠膽再玩包庇，市民絕對唔會放過你哋。嗱，如果你哋唔識執法，不如跟台灣學吓嘢喇。壹淫媒年前喺台灣推出掛羊頭賣狗肉嘅「動新聞」，利用電腦科技販賣色情暴力，激起社會公憤，台北市當局鐵腕懲奸，連續施予重罰，仲講到明見一鑊罰一鑊，壹淫媒先至唔敢咁放肆咋。

多行不義必自斃，淫賤黎淪為過街老鼠，係自作自受，如果港英餘孽繼續姑息養奸，咁就係與民為敵，等住同淫媒一齊「爽到死」喇！