「亞洲車神」黃金寶同○八年殘奧馬術比賽代表葉少康,尋日同獲城市大學頒授榮譽院士銜。阿寶喺媽媽、家姐同女友見證下接受榮譽,而佢母校沙田崇真學校嘅學弟、妹都有到場祝賀,咁當然唔少得港協暨奧委會義務秘書長彭冲同體壇中人親臨撐場啦!
今次係阿寶繼去年獲教院頒發榮譽院士後,再得到另一所本地大學認同,以表揚佢熱心回饋社會嘅功績。佢話感到非常高興,覺得今次由大學頒銜嘅認受性高啲喎。
黃金寶(左)同葉少康獲城大頒授榮譽院士銜。