立法會申訴部今日搬到添馬艦嘅立法會綜合大樓，市民喺咁有藝術氣息嘅會議室度申訴，怨氣唔知會唔會略為消減呢？嚟申訴嘅市民有機會喺四號會議室見到一幅叫做「百年香港」嘅巨型畫作，幅畫採用暖調，作者係曾獲多個藝術獎項嘅林東鵬。
不過，最令立法會秘書長吳文華引頸以待嘅一幅畫，係高齡八十二歲嘅顧媚畫嘅國畫，呢幅畫會掛喺其中一個會議室、一打開門影壁嘅位置，幅畫又係大到要舉頭觀賞，佢特別將佢喺舊大樓辦公室嘅門框，複製為一個畫框將幅畫鑲裱。
市民嚟申訴時，會唔會分心去觀賞「百年香港」呢幅巨畫呢？
