自訂車牌估錯數 庫房倒貼怎收科

如果叫港府高官參加小學數學測試，你估成績會點？唔使審，一定係個個肥佬。事關佢哋樣樣靠估，而且逢估必錯，隨口噏當秘笈，正所謂信佢一成，雙目失明。

財政司司長曾俊華幾乎年年估錯財政數字，港人見怪不怪，原來政務司司長唐英年同樣係「數盲」。呢，唐唐做財爺嗰陣，諗出個自訂車牌計劃，由市民自己揀心水號碼登記座駕車牌，拍賣收入用於扶貧，點知佢唔止估錯數，仲錯到離晒譜。

港府當時吹水話，自訂車牌每年預計進帳七千萬元，但計劃○六年推出以來，收益好似王小二過年咁，一年不如一年，由最初五千八百幾萬，跌到上個財政年度得番二千八百幾萬。

埋單計數，自訂車牌拍賣五年總共進帳二億幾，扣除每年約七百萬行政費，實際收益得一億七千幾萬，同當局預計嘅三億元扶貧目標仲差一大橛，要由庫房「倒貼」填氹。

有立法會議員狠批港府當初過分樂觀，拍晒心口又兌現唔到承諾，擔心拍賣收益持續插水，第日可能連行政費用都唔夠冚。

唉，諗住拍賣自訂車牌可以「一路發」，長賣長有，點知結果變咗「一路插」，愈做愈縮，你話係咪肉酸夾核突吖？叮！

話時話，如果班高官有腦，或者稍為有啲基本常識，一早應該諗到，靚號碼雖然有價，但買少見少，根本冇可能長賣長有。正如業內人士話齋，大部分自訂靚牌早喺拍賣初期已經賣晒，自訂車牌計劃成交價只會愈跌愈低。

叮！呢個計劃從一開始已經注定九唔搭八，港府推個咁嘅計劃出嚟「扶貧」，如果唔係擺明搵笨，就係腦殘。更離譜嘅係，明明個氹愈來愈大，當局居然仲死撐，話拍賣自訂車牌收益係撥歸政府一般收入，唔係直接扶貧，收益同扶貧金額並冇掛鈎喎。

咁都得？收益點入數係港府自己嘅事，市民淨係知道，港府當初承諾推出自訂車牌後五個財政年度每年預留六千萬扶貧，共涉及三億，家陣仲差成億元，當局失信於民，呢筆帳唔通就咁算數吖！

自訂車牌計劃話就話畀車主有更多選擇，結果要由納稅人填氹，你話點收科？講多無謂，食多會滯，跛腳鴨政府與其搞咁多無厘頭嘅嘢，不如做啲實事，搞好經濟民生好過。計太一叮話齋，自訂車牌計劃再死撐落去，遲早乾塘，自身難保，仲扶乜嘢貧吖，叮！