政壇：肥胡梁栢賢謀搞社企醫院

近日各疑似特首候選人嘅支持者浮出水面撐場，好似盛傳將出任政務司司長唐唐競選辦主任嘅「肥胡」胡定旭，前日已公開表明心迹。政圈近日更漏出風聲，指身兼醫院管理局主席嘅肥胡滿腹醫療大計，近排仲拉埋佢嘅好兄弟醫管局行政總裁PY梁栢賢一齊出謀獻策。

本港醫療最大問題係公私營失衡，食物及衞生局局長周一鑊提出「自願醫保」就係想氹市民買保險轉用私家服務。

消息人士話，肥胡同PY就諗過開闢「第三條道路」嘅可能性，由政府成立「醫療發展局」，專責協助慈善團體或非政府機構搞「社企醫院」，以近似私家醫院模式營運，主要針對有買醫療保險、同時又想享用較好醫療服務嘅中產一族，收費方面當然唔及醫管局咁平啦，但亦唔會好似私家醫院咁海鮮價。據講如果呢啲社企醫院賺到錢，就將部分盈利投放番落去提升公營醫療服務。

雖然肥胡同PY呢個大計暫時只係紙上談兵，但可能喺下屆政府就大派用場，話唔定PY分分鐘有機會取代周一鑊做局長都未定添。