政壇：搞搞政：港台員工「抹黑」鄧忍光
政府上周公布空降全無廣播事務經驗嘅政務官鄧忍光做廣播處長，引起港台工會極度不滿。
仲記得佢當日出嚟見傳媒嘅時候，好似政制及內地事務局局長林公公「人肉錄音機」上身咁，問佢憑乜做呢個位？點樣可以維護港台編輯自主？佢都係嗰句「會遵守港台約章」。唔知佢呢幾日有冇度定橋或者度多啲台詞去安撫港台員工，但據聞唔少港台員工仍然氣憤難平，對佢有好大怨氣。
正如佢今日首日返工坐正做處長，工會同日就發起連串抗爭行動，包括呼籲全體港台員工今日着黑衫返工，仲以黑色地氈、口號同標語，擺喺門口迎接新處長，象徵港台步入「黑暗時代」。
希望鄧忍光返工時見到咁多黑影喺身邊飄過時，唔會好似麗港城嗰個警員咁嚇到用手遮擋鏡頭，否則最後「卡住了」就弊嘞！
（設計圖片）