政壇：康叔鐵批勸退要早

呢幾日部分疑似候選人陣營嘅支持者先後公開放話，目的好簡單，咪就係想勸退其他疑似候選人囉。前港區全國人大代表吳康民都話，為防兩雄相爭，漁人得利，中央勸退一人嘅機會較大。不過，佢話政務司司長唐唐同行政會議召集人CY梁振英呢兩個疑似候選人都咁勁，如果要勸退其中一人就要早啲，依家先至勸退覺得有懷疑喎。

康叔《東方》專欄今交代

康叔尋日出席一個酒會時話，若中央要勸退疑似特首候選人就應該早啲，又叫大家留意佢喺《東方日報》嘅專欄《以文會友》，會作詳細交代。佢喺專欄中話，中南海高層唔會咁快就特首人選問題向某些「靈通人士」放風，又話中央勸退其中一人嘅可能性較大，又認為被勸退者不敢不退。佢又話，如果參選前就勸退某人，就等同宣布熱門人選競逐嘅高潮結束，選舉日就全無睇頭。

佢似乎睇透形勢，事關一向對外宣稱立場未定嘅工聯會會長鄭耀棠，尋日突然大膽估計中央政府唔希望建制派多過一個候選人，因為咁樣安全系數最高，又話選舉起初有幾名候選人競逐，但事後因為支持唔夠，或者自己覺得機會細而退選，喺世界各地選舉都係常態，大家唔使覺得奇怪。

唐營放風逼CY棄選

而擺明屬於唐唐陣營嘅廠商會立法會議員林大輝亦不謀而合，話如果有疑似候選人跑跑吓，但最終得唔到足夠支持，應該考慮顧全大局，唔好夾硬落場，以免傷害彼此感情同關係喎！佢仲話唐唐最快應該下星期一辭職，預備選舉工程喎！

棠哥同大輝先後放話，明眼人一睇就知佢哋想勸退CY，咁CY係咪會知難而退？