坑渠油禁之不絕 中國人隨時絕種

考考大家，邊個國家最環保？回收技術最發達？唔使諗，梗係中國啦！連垃圾糞便都可以提煉出坑渠油，本來又臭又毒嘅坑渠水，老百姓日日用嚟炒餸食落肚，廢物利用到咁嘅程度，何止超英趕美，全世界都甘拜下風啦。

嗱，內地坑渠油採用機械化模式生產，早已馳名中外，最近又有新發展喎。公安部首次破獲利用坑渠原料製售食油案，揭發犯罪網絡遍及浙江、山東同河南等十幾個省，搗破地下工場六個，拘捕三十幾人。嘩，犯罪集團規模龐大，若非東窗事發，容乜易賣坑渠油賣到上市o架！

案情哄動唔止由於罪犯猖獗，更加因為揭發有糧油企業狼狽為奸，收購坑渠油生產家庭裝食用油，而檢獲嘅問題食油就超過百噸，假牌食油過百箱。中國人開門七件事，柴米油鹽醬醋茶，依家坑渠油登堂入室，一灶煮食，全家受害，都咪話唔恐怖！

有專家做過推算，坑渠油氾濫成災，中國人每年將多達三百萬噸坑渠油食落肚，每光顧食肆十次，就有一次中招。依家家庭裝坑渠油攻入千家萬戶，情況更加得人驚。

唉，中國人以前赤貧無書讀，近年經濟起飛，老百姓竟然要喺黑心食品中充實化學知識，從大米認識石蠟、從鹹鴨蛋認識蘇丹紅、從奶粉認識三聚氰胺、從金華火腿認識敵敵畏。嗱嗱嗱，北京又有多家包子店被揭發出售黑心肉包，肉香四溢嘅各色包子，原來落咗成分不明嘅香精，食你唔死算你好彩。至於同時揭發嘅問題蜂蜜、問題螃蟹、問題月餅，簡直係小兒科喇！

太一叮好想問問製造黑心食品嘅無良奸商，你哋個良心係咪跌咗落坑渠？定係長期受坑渠油毒害，以致精神出現嚴重問題？竟然為咗個錢字，喪盡天良，殘害同胞，呢種行徑比坑渠入面嘅垃圾更加垃圾，簡直係人類嘅渣滓！

講開又講，內地坑渠油禁之不絕，既係道德問題，亦係法紀問題。無良奸商炮製坑渠油好似攞正牌咁，搞到成行成市，如果話當中冇貪官包庇，細路仔都唔信啦。

咪住，呢啲貪官及奸商會唔會係敵國間諜嚟o架？嗱，太一叮咁講唔係冇道理o架，內地黑心食品無日無之，氾濫成災，再咁自相殘殺落去，中華民族遲早亡種滅國，你都咪話冇可能，叮！