政壇：機師再戰東涌區選
揸飛機要一眼關七，稍有差池就危及全機人，既要安全抵達目的地，又要識得應付突發情況，但諗住捲土重來參選離島區議會東涌北選區、三十六歲嘅民航飛機師Jeremy譚文豪就話：「如果政府係一個飛機師，咁大家要跳機喇！」
Jeremy喺○七年參選過，當年該區有五人大混戰，佢攞到四百四十一票，輸畀現任區議員一百票左右，今年佢有意捲土重來，原來係飛機師性格作祟。佢話做機師必須顧及大環境，仲要善於危機處理，可以話係同從政者嘅工作不謀而合。
講到夕陽政府嘅施政，佢覺得勁唔對路，事關現屆政府做嘢全無方向，又唔識危機處理，好似派發六千蚊為例，突然間話派就派，完全唔識諗吓筆錢應該點用，難怪佢話如果政府係機師，市民真係要跳機自求多福。
譚文豪以飛機師專業人士形象爭取東涌北中產選民支持。