政壇：唐唐支持者滿嘴泡沫

疑似特首候選人唐唐同CY梁振英明爭暗鬥，其中早前發表「垃圾論」嘅唐唐民望插水下跌，一直潛水嘅唐營支持者為咗挽回劣勢，即時現身日夜唱好唐唐。

盛傳係唐唐競選辦主任胡定旭，自爆只要有人搵佢做就會當仁不讓，疑似CY陣營中人嘅專資會創會主席容永祺，突然嚇你一驚話佢上周末長時間祈禱，問上帝應該支持邊個疑似特首候選人，最後得到結論係支持唐唐。就連一直鮮有談論政治嘅貿發局主席蘇澤光，亦罕有地喺出席公開場合時暗示係唐唐支持者。

范太自爆收電郵叫封嘴

依家情況直情係皇帝唔急太監急，咁多人力撐一個仲未表態嘅疑似候選人，同撐一堆泡沫有乜分別？唐唐能否成功入閘都係未知之數，各個挺唐嘅政界中人都係求神拜佛唐唐順風順水，否則泡沫爆破咗，真係喊到無謂喇！

反觀連日來開口埋口提及唐唐嘅全國人大常委范徐麗泰，尋日到香港仔郊野公園幫手清理中秋垃圾時就話，早兩日講唐唐只係諗住同市民交代吓，但之後冇再同對方傾過偈，仲自爆收到好多電郵叫佢唔好再講選特首添。

之後佢出席另一個活動仲表明要講嘅嘢已講晒，再講冇意義，重申倘若想做特首嘅人士，就要快啲去爭取市民支持，因為佢冇諗過支持自己嘅人可轉移支持其他人喎。