政壇：勞處鬼祟遊日韓嘥公帑

卓永興上場做勞工處處長之後，唔單止同勞工團體嘅關係搞得唔好，早前仲竟然「失蹤」唔去開勞顧會，辣慶班勞工界代表，咁都不特止，連研究標準工時都鬼鬼祟祟，唔想畀人知。

早前我哋踢爆政府靜雞雞派咗勞工處助理處長陳圳德，帶隊到比利時布魯塞爾同英國倫敦訪問多天，名義上係考察歐洲落實標準工時嘅經驗，但實際上係搜刮有關標準工時嘅壞影響同數據，作為拖延甚至否決喺香港推行標準工時嘅「黑材料」。有讀者睇完有關報道再向我哋報料，話陳圳德去完歐遊之後，仲計劃去埋日本同南韓考察。

標準工時黑材料上網都有

我哋向相關人士查詢，證實勞工處嚟緊的確會去日韓考察，但具體日期、人數同帶隊人就未定。其實立法會人力事務委員會早前都組團去過韓國考察，並撰寫咗份詳細報告畀政府同其他議員參考，但勞工處係都要自己去多次，如果唔係有心公費旅遊，就係信唔過班議員，一定搵番啲另類觀點同資料反駁立法會。

其實依家資訊科技咁發達，網上資料多到爆晒棚，勞工處想搵有關標準工時嘅黑材料，只要上吓網同發幾個電郵問吓人就掂喇，使乜勞師動眾、浪費公帑去咁多次外訪呀；加上該處七月去歐洲考察又懶神秘，去完又冇向公眾交代，難怪被市民質疑佢哋借考察為名，實際以公費旅遊為實。

話時話，勞工處班官咁頻繁出訪考察外地實施標準工時嘅情況，都係為咗應酬煲呔曾，塞啲料畀佢喺十月宣讀施政報告時講下，若果到時佢仲係噏噏下，冇啲實質建議攞出嚟，班勞工界議員肯定鬧爆佢同勞工處浪費公帑。