政壇：搞搞政：青聯靚女再戰白鴿仔

將有好多政壇靚仔、靚女參與嚟緊嘅區議會選舉，而新界青年聯會副主席梁嘉銘亦可能係其中之一，佢○七年首次參選葵青區議會興芳區，以五百幾票之差落敗，佢今年積極考慮捲土重來，同當區嘅白鴿仔吳劍昇再拗手瓜。

梁嘉銘做地區工作都遇到幾多趣事，話說佢有次落區見市民，有街坊八卦問吓佢結咗婚未，當知道佢名花有主而且結埋婚時，該街坊即時慨嘆自己個仔或者孫仔冇機會，即係娶佢做新抱或孫新抱無望嘞。但收拾心情後竟向佢嘅仔女埋手，講明第日嘉銘生嘅BB要畀佢湊，簡直就諗住當梁嘉銘嘅仔女係自己個孫。

要做區議員嘅話當然要關心區內事務，梁嘉銘最近最關心嘅係有三十幾年歷史、即將進行翻新嘅興芳社區會堂。佢話興芳社區會堂快將維修天花，但歷時需要三個月，佢認為與其要搞咁耐，不如考慮吓擴建社區會堂仲划算喎！唔知個當民意冇到嘅夕陽政府，聽唔聽得入耳呢？