政壇：友邦播關愛紓員工壓力
講起保險營業員，大家都會諗起要努力跑數，壓力可謂相當大，咁擁有全港最龐大營業團隊嘅友邦香港，又點幫員工減壓呢？友邦保險集團執行副總裁阿John朱泰和就話，上司嘅關愛係最佳方法。
究竟關愛嘅力量有幾大？做過中學校長嘅阿John，就好數量化咁解釋，假如員工有九十分壓力，如果有上司與同事嘅關愛，壓力可以即刻跌去十分，剩低嗰十分，就要靠家人、朋友嘅幫手，而且呢十分壓力，話唔定可轉化為工作動力。
其實友邦好注重員工嘅身心健康，阿John話友邦特登喺司徒拔道嘅辦公大樓劃咗啲地方，整個健身室，鼓勵員工工作之餘不忘運動，佢哋更設立咗個積分榜，最活躍參與嘅員工仲有獎勵添！喺公司大力鼓勵下，無論返工前抑或放工後，甚至午飯時間，阿John都見到唔少同事走去健身。
朱泰和話上司嘅關愛可以大大減低員工嘅壓力。