政壇：張建宗針拮優先拆「膠樽」

煲呔曾趕住入伙，唔理添馬艦新政府總部到處甩漏，門常開早前仲被揭發係「門常滲」，但人微言輕嘅官員冇得say no，陸續搬入去做死士，第一個咁唔好彩入去返工嘅局長，就係勞工及福利局局長張建宗。唔好以為有局長返工就萬事俱備，事關佢有座駕接送梗係冇問題，但就難為班公務員囉。

新政總交通不便

每逢有基建啟用，通常都係先做好配套設施至慢慢開張，唯獨係新政總掉番轉。一班勞福局員工尋日搬咗入去後，想慳錢搭吓巴士都唔得，因為新政總仲未有巴士站。有市民仲投訴，話一班住喺港島西嘅公務員好慘情，因為佢哋搭港鐵好唔方便，惟有日日逼巴士到添馬艦返工，但依家最近個站喺演藝學院，落車後要行十幾分鐘。

點知運輸署嘅回應仲離譜，話會有八條巴士路線行經新政總嘅添美道，但係全部都唔係快線，條條都要坐十幾個站至到，不過最離譜係依家仲處於諮詢區議會階段，即係話到最尾係咪真係有晒八條線都未知。

若果張建宗真係關心勞工嘅話，新政總咁嘅交通配套，佢理應諗起「膠樽」。點解？咪即係跨區交通津貼（交津）囉，公務員要跨區工作，打工仔都要跨區工作，而班議員爭咗咁耐嘅交津，到十二月就實施，但有勞工界議員早前批評佢同勞工處處長卓永興歎慢板，張表格都見唔到。

所以話呢，公務員面對新政總交通困難，應該鞭策到張建宗更加着緊「膠樽」，否則到時無論交通幾咁轉折，都會有大批市民嚟政府總部抗議佢。