政壇：蘇澤光冧莊歐洲覓商機
做咗四年貿易發展局主席嘅蘇澤光（Jack）尋日獲政府委任冧莊兩年，繼續為香港嘅商貿港地位打拚。做過多個重量級公職嘅Jack So上任以嚟，就強調香港面對嘅挑戰好大，嚟緊佢又會帶個重量級團去英國，今次仲係貿發局歷嚟喺英國所搞嘅最大一次推廣活動。
今次英國之旅嘅主題係「邁向亞洲 首選香港」，除咗Jack So外，貿發局總裁林天福都會去，佢哋喺倫敦有個高層論壇，所以同行者仲有一啲本地商界嘅名人。Jack So嘅行程包括倫敦、愛丁堡、列斯、劍橋等，據講仲會過埋瑞典斯德哥爾摩，所以正確嚟講，今次應該係歐洲之旅。