政壇：搞搞政：張灼祥搞教育棟篤笑

新學年啱啱拉開序幕，喺教育界服務四十年嘅拔萃男書院校長張灼祥卻決定做埋今個學年，出年八月底正式退休。第日有乜打算？張灼祥鬼馬咁話：「百分百唔會從政！」但就想去文化中心搞棟篤笑，講吓咁多年嚟喺教育界嘅趣聞，或以人性為題材寫小說出書。佢嘅教育棟篤笑都幾令人期待噃！

早前傳有人游說張灼祥以獨立候選人身份出選區議會同立法會，但佢卻話政治唔係佢杯茶。問張灼祥點解唔加入政黨，佢話：「新民黨顧問都冇做啦，入咗政黨要一世忠於個黨，唔好做！」佢又話同啲高官唔熟，退休之後都唔會做官喎。咁做議員又點呢？佢話：「立法會議員可以發揮嘅嘢唔多，區議員更加唔使講，獨立候選人無黨派力量細，發揮唔到不如唔好做。」

六十二歲嘅張灼祥做咗二十八年校長，其中十二年喺男拔掌管校政。佢又話，今年新高中學制差唔多上軌道，男拔嘅大計劃如IB教學大樓同音樂廳又就快起好，係時候功成身退。