政壇：唐唐民望瀉衰多兩個月

發表「垃圾論」惹起全城怒火嘅政務司司長唐唐，至今拒絕收回言論或道歉，佢喺最新公布嘅中大亞太研究所民意調查結果中，亦評分大插水，只得四十四點一分，仲創上任以來新低添。睇番年初我哋曾經請術數師批算多名高官嘅流年運程，唐唐又中咗，佢喺農曆七月遇上「大是非」，師傅尋日仲話佢將會衰多兩個月喎！

一班庸官之所以民望低，除咗係自作孽之外，亦可能關乎佢哋流年運程。香港術數家協會術數師楊子東年初就批過一眾高官運勢，今年兔年貼中財爺鬍鬚曾容易出錯，以及唐唐、政制及內地事務局局長林公公同林鄭月娥運程反覆，其中唐唐兔年行「七煞」運，「運程出現兩個極端，農曆二月有一番傑作，但七月會有大衝擊，忙中略有枝節，有小人及大是非發生，九月更吃力不討好。」

另一疑似特首候選人CY梁振英都唔好沾沾自喜，因為楊師傅話CY嘅運程亦唔係好過唐唐好多，事關佢忌金、土，農曆九月屬土，CY沖到正，做乜都只會「徒勞無功」，到十一月就更加洩氣。今次係咪講得中，睇埋呢兩至三個月就自有分曉。