政壇：煲呔曾新疆鬼祟避記者

煲呔曾管治無方，民望低處未算低，尋日中大亞太研究所公布嘅民調結果又顯示，佢嘅評分只得四十六點五分，較七月份再跌零點五分，而市民對夕陽政府管治班子嘅信心亦下跌。民望唔見得人，去咗新疆烏魯木齊出席亞歐博覽會嘅煲呔曾，連續三日避見傳媒，相反新疆黨委書記張春賢就大大方方，接受香港傳媒訪問，完全唔似煲呔曾左閃右避咁小家。

其實煲呔曾以往外訪都會喺當地簡報行程，最起碼回程時會作小小總結，亦畀傳媒提問了解吓出訪工作。不過，今次煲呔曾去新疆三日卻未見過記者一次，唔知係咪因為近排政府醜聞多籮籮，一陣黑影論、一陣又有垃圾論，煲呔曾聲稱被撞傷一案尋日又輸官司，搞到佢都唔敢面對記者，一於閃得就閃。

另一方面新疆黨委書記張春賢就唔止冇迴避記者，仲答咗好幾條關於疆獨喺香港風險嘅問題，作風非常開明。早排政府先講明會配合傳媒採訪，但依家煲呔曾見記者好似見鬼咁，講一套做一套咪就係呢啲囉，所以話夕陽政府等收工真係冇錯。