政壇：何猷龍夫婦百萬撐病童
明愛醫院為住院病童提供遊戲服務嘅資源緊絀，有見及此，賭王何鴻燊公子、新濠博亞聯席主席兼行政總裁何猷龍同太太，日前就捐出一百零三萬七千三百元，資助智樂兒童遊樂協會為期三年嘅「醫院遊戲展生機」計劃，令七千二百名明愛醫院嘅病童享受遊戲樂趣，忘卻治療期間嘅恐懼，喺笑聲中康復。
何猷龍好有心，日前親自去明愛醫院探訪病童，並送上一張巨額支票，令受惠病童好感動，送上大型感謝卡致謝。何猷龍熱心公益，不時探訪患有發展障礙或長期病嘅住院病童，由佢領導嘅新濠集團，年初同攜手扶弱基金贊助由智樂主辦嘅「愛心行動—醫院遊戲服務」，同醫院遊戲師化身「樂玩大哥哥、大姐姐」，逗得病童笑呵呵。
何猷龍（右）送上逾百萬元支票，智樂總幹事王見好（中）同明愛醫院代表李靜賢醫生（左）深表謝意。（被訪者提供）