政壇：工專聯保皇爆內鬥

政治聯盟嘅基礎從來係利益為先，早排幾個商界政團手拉手搞咗個工商專業聯盟，尋日佢哋就首次以聯盟嘅名義發聲明譴責日前衝入替補機制諮詢會嘅示威者。不過，呢次處女出擊卻鬧出鬼鬼祟祟、藏頭露尾嘅醜事。據知，本來有人打算喺聲明上落齊十二個立法會議員嘅名，點知內部講唔掂數，有人強烈反對落名，擺明唔想為聯盟召集人林健鋒(Jeffrey)抬轎，最後篇聲明只落咗工商專業聯盟個名，呢招集體負責等於集體冇責，足見聯盟一盤散沙、各懷鬼胎。

Jeffrey執口水尾

由經濟動力、專業會議、富貴黨同中總等十二名議員組成嘅工商專業聯盟，早排結盟時係威係勢，話到明會為商界同佢哋關心嘅事務同一陣線，點知連簡單如發張新聞稿都勾心鬥角。事實上，前晚替補機制諮詢會爆發大混亂後，富貴黨深夜已率先自行發稿譴責事件，事隔十幾個鐘，Jeffrey再以聯盟名義發稿，內容其實同富貴黨大同小異，難逃執人口水尾之嫌。

最搞笑嘅係，我哋聽到Jeffrey原本係想將聯盟十二位議員個名，全部列晒落新聞稿嘅稿尾，但遭到個別議員反對，不過佢哋唔係想反對聲明內容，而係認為Jeffrey想幫政府護抗譴責事件，大可自行以經濟動力名義發稿，毋須拖晒所有人落水，畀人「群星拱照撐Jeffrey」嘅感覺。各方最後都同意Jeffrey以聯盟召集人名義發稿。

不過，Jeffrey都藉聲明做保皇揚聲機，不但嚴詞狠批示威人士強行撞開大門，以暴力衝擊會場，擾亂秩序，仲話「那些示威者打着言論自由的旗號，其行為卻嚴重踐踏言論自由」，事實證明呢啲人至係蓄意破壞本港治安秩序者喎。