網民等「復辟」睇好戲

【本報訊】「志雲大師」贏官司的新聞出街後，本港多個網上討論區均見大批網民熱烈討論、議論紛紛，網友最聚焦的關注點之一，是志雲會否「復辟」及無綫內部會否因此變天，笑指「跟住嚟嗰啲先叫好戲呀」。另亦有不少網友炮轟廉政公署「雷聲大，雨點小」、「無鬼用」。

網民「hwwong」指「陳總肯定來一個大變天啊……」；「小朋友」就稱「之前唔幫志雲班人依家腳仔軟鳥」；「paulchen」則笑言「大C（大師）又可以返回6嬸身邊，620（樂易玲）有排震」；「河蟹」更指無綫可「將成件案古仔拍番套劇，搵大師做番主角」。

至於廉署又輸大案，亦淪為網民「箭靶」，其中「belebala100」直斥「ICAC無鬼用」；「Joeycky」更提及多年前的「舞影行動」，表示「ICAC次次告唔入，仲要浪費公帑，社會幾廉潔都使光納稅人的錢」。