政壇：史美倫榮升金融猛人
行政會議成員、港交所獨立非執行董事史美倫係金融界服務多年，曾做過香港證監會副主席、又為中證監做過嘢，香港證券專業學會每年都會頒授榮譽會員資格畀一名喺業界具有崇高地位嘅猛人，今年呢位猛人就係史美倫。
證券專業學會已訂喺十月二十七日嘅秋季晚宴上頒授有關資格，攞過呢個榮譽嘅人都來頭不小，譬如李業廣、利國偉爵士等，二○一○年度係前聯交所主席鄭維健。史美倫明年喺港交所做足六年，未來動向更加受人關注，究竟佢會離任，定係更上一層樓呢﹖
史美倫下月將獲香港證券專業學會頒授榮譽會員資格。