政壇：搞搞政：擁三千萬靚舖 孫公得個名

縱橫官場多年嘅教育局局長孫明揚最近被踢爆擁有估值高達二千八百萬元嘅西環地舖，但佢作為主要官員，卻從冇申報過。孫太鍾小芬接受查詢時話，因為孫公嘅父親已經把該物業畀咗啲孫仔孫女，所以佢同孫公都冇過問呢件事，咁孫公係咪有得睇冇得袋呢？

不過，呢個位於西環第三街一四七號嘅地舖及地庫，由孫氏家族於一九五五年購入，當年作價僅三萬六千元，今時今日據代理估計，喺西港鐵線嘅刺激下，舖位收購價料將高達二千八百萬元，較買入價升值七百幾倍，升值潛力相當驚人，而家吓地舖就以一萬三千多元筍價出租。

其實孫公已經唔係首次被揭有神秘物業，好似早前以註冊業主身份出售跑馬地黃泥涌道一個住宅單位，經查證後先知孫公係以遺囑執行人身份作為註冊業主賣出有關單位，其實個單位係屬於孫公家族物業，並由成個家族嘅第二代共同管有。孫公仲有幾多不為人知嘅神秘物業未曝光，真係一個謎。