政壇：項明生愛感動天降神雨
Sony Computer Entertainment HK Ltd市場部總經理James項明生，今日起正式升職為香港分公司董事，成為首位躋身董事會嘅華人。佢話今次升職好開心，佢入職公司十三年，證明只要畀足心機做嘢，梗有出頭嘅一日。
舊年公司新設立「企業策略部」負責公益慈善活動，都係由James負責。鍾意遊山玩水嘅佢於是更加努力去玩，然後瞓身寫書，收益全數捐畀慈善機構「小母牛」。上星期佢又跟小母牛一眾捐贈者去貴州探訪，當地仲落咗一場媲美神迹嘅及時雨。話說當地已連續六十日冇落雨，佢哋見到土地乾旱龜裂，村民欲哭無淚。點知有日突然落傾盆大雨，農民猛話係香港人嘅愛心感動個天，所以至落咗場及時雨，大家都話好神奇。
項明生（右）同葉澍堃（左）一齊幫受助農戶整理粟米。（項明生提供）