政壇：四曾鬥衰 網民狂插

煲呔曾趁住班學生哥今日開學，尋日就將預先拍好嘅宣傳片段擺上社交網站，叫班學生哥要畀心機讀書，睇怕都係想為近日鬧到滿城風雨嘅保安安排風波降吓溫，點知捉蟲，隨即畀網民狂插，仲燒埋政府「四曾」添！

好多網民喺網站鬧爆香港之恥曾氏四人幫，包括煲呔曾、財爺鬍鬚曾、曾偉雄同埋民政事務局局長曾德成，「將自己活生生地上演何謂無恥給下一代學習看。」又有家長要求煲呔曾炒咗曾偉雄︰「你炒咗曾偉雄同孫明揚先同我講嘢啦！一個堂堂警務處長當眾畀假口供，搞到我唔知點教仔。」亦有人要求煲呔曾同曾偉雄齊齊落台。

曾偉雄嘅「黑影論」同「卡住了」亦畀網民惡搞，話︰「殺人係咪可以話見到黑影，所以自保。搶槍可以話係死差佬個槍袋卡住隻手。」總之一句講晒，「四曾」就乞人憎啦！