政壇：四叔女婿撐嘉能可股價

今年至喺香港上市嘅嘉能可，遇着金融市場動盪，股價唔多靚仔都冇辦法，可能個價真係好抵，李寧少少地吸納股票以示支持。大家唔好誤會，此李寧並非體操王子、李寧董事長嘅李寧，而係恒地主席「四叔」李兆基嘅大女婿李寧，佢依家都係嘉能可嘅獨立非執董。

嘉能可上市嘅時候好巴閉㗎，擁有好多知名投資者，其中一個係四叔，佢嘅女婿李寧仲入咗去做董事添！公司尋日公布，李寧前日買入咗6.2萬股嘉能可股份，每股作價48.87元，總共三百幾萬元，尋日個價升番上五十蚊樓上，李寧之前並冇持有嘉能可股份。

唔講唔知，原來李寧同嘉能可行政總裁Ivan Glasenberg ，喺八十年代加州讀書時曾是同學，唔知係咪咁，所以拉埋佢入嚟幫手。

李寧嘅太太李佩雯係四叔嘅大女，四叔喺自傳入面曾經透露，話李寧最佩服嘅就係岳父嘅胸襟，四叔對員工寬容愛護，從來唔鬧員工，喺九七亞洲金融風暴期間，寧願安排一啲部門由六天改為五天工作，減少用水、用電，也要保障員工安居樂業。