政壇：李少光可邪可正遺傳囝囝

近日因為國家領導人訪港嘅保安安排風波，保安局局長李少光要四出解畫，就連佢個仔Glen李霖恩都被網民熱烈討論。有網民就喺討論區發貼，話Glen入咗娛樂圈都成十年，最近就喺某電視劇飾演一角，早兩晚仲擔正演出，都叫做曝光率高咗，先至多番少少人氣，更戥Glen唔抵話：「係咪因為佢係李少光個仔反而累咗佢？」

呢位網民話，其實Glen嘅可塑性好高，演技都唔差，過去試飾演家丁下人，又試過做將軍，喺戲嘅角色可正可邪，可低微可高貴，有時簡單傻氣，有時又陰沉機心。講到「可正可邪」就有啲似爸爸李少光，事關李少光一時又話要保障市民表達言論嘅權利，一時又撐警方嘅保安部署冇錯，都係一時一樣、亦正亦邪，唔知係咪平時過番兩招畀阿Glen呢？

李霖恩嘅演技備受網民熱烈討論。