政壇：新交津歎慢板英姐扯火

跨區交通津貼新計劃將喺十月一日展開，但政府仍然歎慢板，所有申請手續、批核時間等安排細節仍然未公布。一班勞工界立法會議員對呢件事非常上心，一早叮囑勞工及福利局局長張建宗，快啲畀張申請表格佢哋先過目，萬一有錯漏都可以即刻修改，避免出錯引起混亂。不過，暑假完咗，張建宗一啲聲氣都冇，激到班議員紮紮跳，話畀個良心佢當狗肺。

身兼立法會人力事務委員會副主席嘅勞聯李鳳英好勞氣咁話，其實喺實施前睇睇張表格，都係想幫政府睇下有冇甩漏，可以及時修改啫。

英姐話，好似關愛基金派六千元畀新移民嘅表格，張「示範表格」上面，名稱嗰欄寫咗「陸仟圓」三隻字，政府以為咁好得意，但就搞到班新移民以為要改名換姓，以為填表時要填「陸仟圓」做自己個名，而佢近排亦收到好多投訴。老實講，張建宗衰過好多鑊，呢次班勞工界提到出晒面，若果佢再唔聽，肯定再衰多鑊。