政壇：董耀中再玩兩年

服務香港旅遊業議會嘅現任總幹事「阿董」董耀中，原定喺年底就夠鐘退休，旅議會亦早已搵到合適接班人，但點知到臨簽約前撻Q，最後決定搵番阿董做多兩年。由於政府正檢討旅遊業規管架構，好大機會會廢除或者大幅改革旅議會，令阿董有望成為旅議會嘅末代總幹事。

接班人縮沙嘥40萬

旅議會早前透過獵頭公司招聘新總幹事，據聞有多人應徵，但完全符合各項條件同要求嘅唔多。有關評選委員會經過多輪甄選，早前終於選定一名業內人士接棒，點知最近想同佢正式簽約，佢就臨時縮沙，但係原因不明，白白浪費高達四十萬元嘅招聘開支同心血。

其實旅議會都曾經諗過重新進行招聘，但啱啱嗰次公開招聘已花咗四十萬元，若果再嚟多次，擔心又會畀人話嘥錢，加上旅遊業規管架構大改革在即，與其再花時間請過個新人，不如搵番舊人做，於是就游說已諗定退休大計嘅阿董「再坐一會」，阿董亦一口答應，續約兩年至二○一三年底。就因為咁，阿董嘅退休大計就要推遲多兩年。

阿董本身係富貴黨成員，○八年辭任旅議會總幹事，循旅遊界功能界別參選立法會，但最後以九票之差輸咗畀「法律超人」謝偉俊，選後又畀旅議會請番，受到部分業界質疑。有旅議會理事私下話，其實對阿董一再續約有保留，只不過依家業界「兵荒馬亂」，佢哋選擇唔多，先至被迫支持。阿董本人對再獲續約以平常心對待，又話早已無意再次參選，會專心做好旅議會工作。