CULTURE 噏：月光光 anything wrong ？

月光族是新興的網絡用語，即每個月花光所有薪金，無儲蓄習慣。近年愈來愈多年輕人成為月光族，這種生活模式，反映這群香港未來主人翁，對將來沒有計劃。香港中華基督教青年會荃灣會所程序幹事林昊志認為，本港樓價飆升，80後要儲錢買樓有心無力，有人因而無奈打消儲蓄念頭。

這次記者找來80後月光族Zero，講述他的經歷及看法。

Zero

每個月一出糧，我都會約埋班friend去玩，可能落Bar或者唱K；見到衫褲鞋襪幾靚，會諗都唔諗就買，加埋搭車食飯呢啲開支，好快用晒成份糧，到月尾銀行戶口得番幾十蚊，有陣時仲要問朋友借少少錢，先至可以捱到出糧。

林

香港物價不斷上升，但係80後，特別係低學歷嘅人工只係加少少，追唔到通脹，人工自然無咁見使。加上佢哋容易受到朋輩影響，見到朋友花錢喺某地方，如去高級食肆食飯，又會做埋一份，因而使多好多錢，甚至成份人工都唔夠使。

Zero

屋企人都有話過我無乜點畀家用，自己又月月清，擔心我以後唔知點算！

林

其實，好多80後都知道儲錢的重要性，亦有諗過儲錢，但係有部分青年嘅父母仲做緊嘢，唔需要兒女畀家用。另外，部分更抱有「人不風流枉少年」嘅想法，覺得應該趁後生玩多啲，唔需要咁快就儲錢，錢可以遲啲先儲嘅心態。

Zero

我有時都會諗，應該計劃將來，儲錢第時結婚買樓。但係除咗樓價貴，擺酒都會花好多錢，無二、三十萬都唔使諗結婚，但以我現時人工嚟睇，要儲咁多錢，真係遙不可及。

林

好多人儲錢嘅目標，都係買樓結婚，或者做小生意。但普通打工仔，分分鐘要儲成十年先買到樓，有人會因而產生消極諗法，覺得儲得咁辛苦，倒不如唔好儲，好好享受現時生活仲好，令到更多80後成為月光族。

Zero

我都覺得咁做有問題，希望盡快養成儲蓄習慣，減少不必要開支，我打算將目標定喺每個月儲二千蚊先，之後再慢慢加，相信好快脫離月光族！

林

80後儲錢，最緊要諗清楚儲錢目標，開始時唔好set得太高，可以係去旅行之類，之後再提高目標。

Zero

從事文職工作，工作兩年，每個月都會花光所有薪金，無儲蓄習慣。