政壇：搞搞政：鼠王芬叉足電蒲頭再捉鼠

發表「懲罰選民論」後，專業會議立法會議員「鼠王芬」梁美芬銷聲匿迹咗好一段時間，直至前排工商專業聯盟成立，佢先至重現大家眼前，但大家冇將焦點放喺佢身上。早幾日佢同其他專業會議員去見煲呔曾反映施政報告建議，會後佢都好似有鏡頭恐懼症咁，唔多願意接受訪問，經過多番要求，佢先肯講幾句嘢。

西安度假敍天倫

原來，前一個星期鼠王芬去咗西安玩咗四、五日，志在共敍天倫，一家大細喺城牆上踩單車，飽覽西安景色，佢笑言此行係佢補充「維他命F（Family家庭）」嘅機會。睇真啲，佢嘅髮型同以前唔同咗，佢笑笑口話前排去髮型屋時，髮型師提議佢剪短髮，但佢又覺得唔係好慣，所以改為電髮，唔知佢呢個新形象能否為人所接受呢？

玩完又叉足電嘞，又有乜搞作？聽日就會重出江湖，解決九龍西五個公眾街市嘅鼠患問題喎。原來又做番「老本行」——捉鼠。