政壇：街坊押後化療 幫葛兆源拉票

荃灣福來選區一直都係白鴿黨勢力範圍，但喺上個月補選，工聯會新星「源仔」葛兆源就以大比數拋離白鴿黨對手，勝出漂亮一仗。原來，佢本身喺福來邨出身，住到十幾歲先搬走，依家仍然住喺荃灣，所以班街坊可以話係由細睇住佢大。

今年二十七歲嘅源仔已服務咗呢個區幾年，同班街坊感情十分之好，佢仲記得補選當日，有一位患癌嘅伯伯係都要幫佢助選，佢最初拒絕咗，擔心會影響對方病情，點知呢位伯伯靜靜雞幫佢企街拉票，佢事後先知對方特登為佢向醫院請假，押後接受化療，佢知道後差啲喊咗出嚟。

正正因為得到班街坊支持，所以源仔事事亦親力親為，唔敢假手於人。

好似有次探訪一個住喺唐樓嘅新移民家庭，對方經濟拮据，差啲冇飯食；佢二話不說，即時為對方搵咗一大包白米，仲行幾層樓幫對方托米返屋企。身材瘦削嘅源仔話，托完先知自己身體差咗，仲話以後一定要做多啲運動添！