政壇：唐唐最叻請飲請食

夕陽政府真係做乜都衰，好似作風「條條fing」嘅政務司司長唐唐經常講錯嘢，被人鬧爆之後都唔反省，唔單止一錯再錯，仲愈講愈錯，而早前回應有關國家領導人訪港保安安排嘅質疑時，一句「completely rubbish（完全是垃圾）」，除咗惹起公憤，畀各界狂轟之外，亦被人捉到佢英文差。

「五毛黨」電郵鬧爆

老實講，唐唐英文差唔係今日先爆出嚟，好似港大英文系一級榮譽畢業嘅立法會議員葉劉淑儀，之前都批評過佢，尋日仲自爆鬧完唐唐之後，就畀人鬧爆報復添！

葉劉做校長嘅匯賢智庫學苑搞咗一個英文班，尋日壓軸論壇由佢親自教授，佢對住班後生仔話，唐唐曾經用英文批評過社民連「長毛」梁國雄喺立法會嘅行為，但係用咗「現在式」，佢就覺得應該用「過去式」先至啱，所以佢公開批評過唐唐，點知後來就有啲「五毛黨」接連寄電郵鬧佢。邊個喺幕後指使？大家諗吓喇！

揶揄乘機博人支持

跟住有個學生又問到「政治唔係請客食飯」嘅英文點講？呢個問題簡直開正葉劉嗰瓣，葉劉好快就話︰「請食飯用wine and dine，唐司長就做緊，佢成日請人飲靚嘢、食靚嘢，等人支持佢嘅陣營。」真係句句寸到盡。

講完英文，葉劉又點評同學仔寫嘅有關外傭爭取居港權文章，仲提到之前有人話佢早年做保安局局長時，應該知道會出現外傭居港權嘅問題，佢都承認當時已經知道呢個情況，但至於點解嗰陣唔解決，佢就冇交代嘞！