短打長擊：民永係傻佬 門常開搵丁

通脹加速惡化，來勢之洶，小市民無不深有感受，衣食住行，價格無一不顯著飆升，原來七月份通脹高達百分之七點九，是近十六年來的新高。「太一叮」話「通脹升到冇朋友，港府派糖要快手」，認真生鬼又應景。

講真，基層市民或許唔多知乜嘢叫外圍經濟惡化、本港經濟收縮放緩，但係一定感到人民幣升值，港幣一日一日咁唔見使，一百蚊去到超市或街市，「喳」一聲就冇晒，做家庭主婦的日日唉聲嘆氣話「唔識買餸」，唔好話出街請親朋戚友食飯，叫人返屋企吃頓便飯都唔敢。你話喇，大家冇咗斬大舊叉燒、杯上杯落嘅日子，梗係「通脹升到冇朋友」啦！

政府派六千蚊慢到冇人有，真係餓死都未天光！有學者甚至估計，本地通脹年底將進一步攀升。長者填完、遞完表，再等派錢過數，等吓等吓，容乜易又老一年，六千蚊又貶值一大截？未曾拜神已經唔見咗隻豬。

呢個政府真係冇鬼用，一日到晚亂噏「民永繫」、「門常開」，計我話「民永『係』傻佬，門常開搵丁」就真！煲呔曾政府大話吹咗六、七年，社會深層次矛盾激增；財經高官「以不變應萬變」，抱殘守缺，不理聯繫匯率早已與現實脫節，眼見港元跟隨美元係咁貶值，財經高官仍然自我感覺良好。基層市民未來的日子，每天都是通脹猛於虎，跨不過便陷入絕境。

政府如此不思進取，面對高通脹，基層苦上苦，中產變「中下產」，工作體面卻無閒錢，唔上街嗌兩聲，肯定抑鬱而死。