SUN世代：快樂開荒牛先蝕後賺

萬事起頭難，又有誰願意當「開荒牛」？原本可以當幸福滿溢的全職媽咪，但徐玉珊（Lancy）卻選擇加入一間在港剛起步的人力資源公司。由開門、聽電話，到斟茶遞水都要一腳踢，但Lancy毫無怨言，一做就十年，成為今天掌管香港、澳門、越南三地，帶領超過二百名員工的董事總經理。她分享成功之道：「做人最緊要唔好怕蝕底。人哋叫你做多啲嘢係畀機會你，袋錢入你袋。」

在澳洲墨爾本大學唸心理學，畢業後做過航空公司地勤，跟人力資源可謂風馬牛不相及，Lancy坦言「入行都係一個機緣巧合」。「當時有間美國公司喺香港開新公司，朋友叫我過去幫手。都幾struggle，嗰時個仔仲好細，但又覺得機會難得，所以就抱住試吓嘅心態去幫朋友。」

「人哋肯用你就要珍惜」

新公司漸上軌道，員工由四名增至一百四十名，業績理想，愈做愈大。Lancy的出色領導才能得到美國總公司賞識，被遣派到馬來西亞、菲律賓，培訓當地員工及提供專業意見。每次出差長則三個月，短則幾個星期，令Lancy過着「太空人」般生活。不過她認為機會來到，就要爭取：「既然人哋肯用你，就要珍惜，機會係唔等人。」珍惜的何止是每一個機會，還有這份工作帶來的快樂。「呢份工好有滿足感。可以幫到人搵工之餘，又可以幫人搵到啱嘅員工，真係做得好開心。」十多年來，見過無數的僱主和求職者，閱人無數。說起印象深刻，Lancy腦海中就浮現一位多年前的求職者。

難忘勸服大學生接受新工

「個男仔啱啱大學畢業，去完面試之後無接受到份工。因為份工只係簽一年約，人工同佢期望嘅差五百蚊。但我同佢講，如果永遠想揀最啱嘅機會，只會失去更多機會。」經過Lancy的分析後，該名「新鮮人」最終接受了新工作。

半年後，Lancy接獲他的電話。「佢打嚟多謝我，話已經成為正式員工。我都好戥佢開心。」除了香港和澳門，Lancy現時還兼顧越南的業務。面對同樣起跑不久的越南新公司，不怕蝕底，敢於接受挑戰的Lancy會貫徹始終，繼續做成功的「開荒牛」。

Lancy's Profile

現　　職：ManpowerGroup香港、澳門及越南區董事總經理

學　　歷：澳洲墨爾本大學心理學學士，副修商業管理

婚姻狀況：已婚，育有一子一女

公　　職：基督教勵行會培訓服務屬下貿易諮詢委員會（就業服務）成員