政壇：政壇美女下廚抗通脹
通脹率創十六年新高，市民生活百上加斤，有政黨就出招幫市民設計出「抗通脹菜單」，列出一周七日嘅三餸一湯菜單，平均每日只須六十一元就有均衡營養。立法會議員陳克勤尋日親自率領新界青年聯會理事Casta呂迪明同沙田青年協會副主席Kelly董健莉兩個美女廚神，即席烹調菜心炒牛肉及魚肉蒸豆腐兩味抗通脹菜式。
睇Casta同Kelly攞起鑊鏟時都有板有眼，但Casta自爆首次入廚係中一家政堂，切蘿蔔時唔小心切親手指流血，佢即時想抹走啲血扮冇事，但當然逃唔過眼利嘅家政老師啦。Kelly就係深閨女孩，每月至少都會返屋企煮飯一次，而且逢周日又會約埋大班朋友，各自帶一道菜一齊開餐，認真開心。
呂迪明煮菜心炒牛肉，色香味俱全。