政壇：搞搞政：葉劉杜絕翻版陳岳鵬

匯賢智庫嘅陳岳鵬做做吓區議員，舊年突然被政府挖角去做特首辦特別助理，辭去南區區議員同丟低班選民，結果佢哋喺補選輸得一敗塗地。之後匯賢智庫變身新民黨，加上區選臨近，據聞主席葉劉淑儀已向各準候選人下令，講明當選區議員後，就算被下屆政府委託做政治助理等要職都要耍手擰頭拒絕，避免出現翻版陳岳鵬。

有核心黨員透露，陳岳鵬突然離隊對新民黨好傷，所以喺補選中輸鑊甘。佢哋之後檢討過，發現依家做區議員已經唔同以前，以往係區議員帶領街坊爭取利益，依家街坊覺得議員係為佢哋服務，仲訂下目標要議員完成，所以做做吓突然走咗去，班街坊會覺得畀人呃咗，喺補選多數輸硬。

所以葉劉有令，叫班準備出選嘅黨員唔好諗住「借殼上市」，選到之後就好似陳岳鵬咁扶搖直上，講明邊個都要做足四年任期，否則唔使諗做政府委任嘅筍位。