政壇：六叔眼睩睩拍拖歎咖啡
「六叔」邵逸夫同「六嬸」方逸華前晚喺金鐘太古廣場歎茶，見六嬸同幾個友人有傾有講，但坐住輪椅嘅六叔就背住六嬸張枱坐，面向商場，全程由外傭照顧，而六嬸就不時望吓六叔嘅情況。六叔眼仔睩睩咁望住途人熙來攘往，睇落相當精神健康。
當佢哋準備離開時，記者上前打招呼，六嬸有啲錯愕，仲話：「幾乎畀你嚇親呀！」至於六叔唔單止冇嚇親，仲用好友善嘅目光望住記者添！
問六嬸有冇趁暑假去旅行，但佢冇透露任何嘢，然後一行幾人離開現場。咁啱得咁蹺，同日下晝記者又喺中環皇后大道中遇到另一位無綫電視高層，就係業務總經理陳志雲。當時陳總正等候座駕接載，期間不斷講電話，當記者上前攀談時，佢就好主動話最近忙緊節目巡禮，啱啱開完會出嚟，跟住又趕下一場喎。見佢全程笑住口，似乎無被近日官司影響心情喎。
六嬸方逸華（後排右）不時望吓六叔嘅情況，而外傭就坐喺旁邊照顧六叔。