政壇：重返「胸」案現場 煲呔曾惹狙擊

煲呔曾今日會為佢任內最後一份施政報告，落去尖沙咀科學館進行地區諮詢，以煲呔曾親疏有別嘅脾性，入得場嘅九成九係佢自己友。即使如此，社民連同人民力量決意追到底，誓要令煲呔曾難睇。大家唔好忘記，今年三月喺科學館廣場，社民連成員狙擊煲呔曾後，煲呔曾大搖大擺去食晚飯，食完先至話自己遇襲胸口痛，走去醫院驗傷。唔知今日煲呔曾又會玩乜嘢花臣，抑或係出動數百警力，將成個尖沙咀都變成核心保安區呢？

圍攻科學館促下台

今日場地區諮詢會由傍晚六點開到七點四十五分，只有獲邀人士可以出席，例如區議會、分區委員會、地區諮詢委員會同埋地區團體成員等。煲呔曾喺會上講完開場白後，連傳媒都唔可以留低。

社民連發起「狙擊施政報告諮詢會——立即撤回遞補機制，要求曾蔭權下台」行動，呼籲支持者今日五點半到科學館。今年三月社民連成員送粟米斑塊飯畀煲呔曾，唔知今日會送乜嘢畀佢呢？另一邊廂，人民力量亦醞釀衝擊行動，終極訴求係要煲呔曾下台！

回想今年三月，社民連成員黃俊杰同黃浩銘，因為衝擊煲呔曾而被控擾亂公眾秩序罪，單案下個月先至裁決。轉眼間，煲呔曾今晚又重臨案發現場，話唔定佢會變成驚弓之鳥，要警察重重簇擁、包圍住佢入場，再唔係就可能叫建制派動員，喺科學館門外牽制住社民連同人民力量嘅示威者，更甚者可以嗌戒嚴，總之就係唔理好醜，但求冇事就算。

另外，近日有人自稱代表人民力量出選十一月沙田區議會廣源選區，點知原來係有人招搖撞騙，幸好有支持者迅速報料，人民力量急發嚴正聲明以正視聽，佢哋仲表明，對於一切訛傳或者失實言論，保留一切法律追究權利，仲叫受騙人士盡快報警求助。