SUN世代：爆橋太子爺顛覆月餅傳統

人的成功，不在於擁有多少，而是創造多少。大班麵包西餅太子爺郭勇維（Garic），拋開富二代繼承祖業的枷鎖，追尋自己的理想！讀傳播、跑新聞、任助導、度廣告，每走一步，只是隨心而行。這種率性令他的「行銷王者」潛能大爆發，他顛覆整個月餅市場，奠定大班冰皮月餅成為一線品牌的地位。

別人夢寐以求有個富爸爸，Garic卻拒絕活在父蔭，矢志憑實力往外闖。Garic在加拿大讀大學，主修傳播學系。九三年學成回港，加入當時開台不久的電視台，開展其傳媒事業。「初時做助導，兩年後升做助理監製，做嘢幾刺激，但慢慢就有啲悶，好想試其他。」銳意要擴闊眼界的Garic遂轉型當財經記者，並成為第一代財經「烽煙」節目主持。

做財記獲無比滿足

記者這份職業，令Garic獲得無比滿足感：「做財記可以好短時間涉獵唔同規模嘅企業，個人會成長得好快，緊貼住社會脈搏，呢啲經驗對營商好重要。」二○○○年，適逢捲起科網股熱潮，Garic立即抓緊機會，投身新興媒體，任職新聞編輯，「財經網站喺當時好新鮮，好想盡早涉獵！」

累積豐富的財金知識後，Garic轉戰商場，於○三年開設顧問公司。「跑咗幾年財經新聞，慢慢發覺個市場目光已轉向內地，本地記者嘅優勢減少，所以我覺得自己都要改變。」市場環境驟變，更令他決心要尋找另一理想，「有日去採訪一個好細嘅上市公司年度股東大會，場上好多公公婆婆。個老闆留住間冇乜錢賺嘅上市公司，可能係為咗畀小股東收息養老。」於是他立志要經營一家讓股東、員工、社會都有裨益的企業，大班麵包西餅正是他的試金石。

絕世好橋咪錶廣告

○三年，Garic以顧問身份為大班出謀獻策，將不少營銷必殺技傾巢而出，成功將大班冰皮月餅打造成著名品牌。「八九年，我哋已經推出冰皮月餅，我覺得呢個產品好有潛力！」為擦亮招牌，眼光獨到的他，充分發揮記者的敏銳觸覺，「沙士一役後，政府請咗西班牙足球勁旅皇家馬德里來港比賽，球星雲集，有碧咸、朗拿度等六條『煙』，我覺得呢個係機會！」 Garic深知機不可失，隨即拍板爭取贊助香港代表隊，以及電視直播冠名權。「當晚收視高達五十點，三百二十幾萬市民識咗大班呢個品牌！」

○六年，他又有出其不意的廣告「好橋」，買下全港近萬個泊車咪錶的廣告位，「個位擺咗成年都冇人吼，我發現咗即刻叫父親落廣告！」別人當係草，他視為寶，這種突擊式的行銷方法，大獲業界好評。「做生意一定要認清核心競爭力，睇準邊樣產品係主要賣點！建立品牌嘅鮮明形象，需要兩大元素，就係創新同正宗。」

不斷求變，勇往直前是Garic的營商策略，○七年起他正式入主公司，目標仍是突破固有框框，「要挑戰傳統智慧，送禮唔一定送傳統月餅！」

Garic's Profile

現職：大班麵包西餅董事暨業務拓展總監

學歷：加拿大安大略省溫莎大學傳播研究學士

婚姻狀況：訂婚