政壇：蔡衍明高壓氧醒腦鬧人

亞視股權糾紛官司仍然未搞掂，甚少喺香港露面嘅股東、旺旺集團董事長蔡衍明，尋日喺公布業績前就同一班傳媒見吓面。

蔡衍明話每日只係瞓四個幾鐘，原來佢患有睡眠窒息症，但因為部呼吸機搞到佢瞓得唔好所以唔用，反而戴個牙套瞓覺效果仲好喎。早排佢仲花咗二百幾萬台幣（逾五十萬港元）買咗部高壓氧機擺喺屋企，每日都入去吸一個鐘，腦筋清醒連開會罵人都比較順暢，而且每日瞓三個鐘就精神百倍。

不過，佢話每次返港就會諗起亞視，仲會好激動，事關好不滿亞視唔當佢個仔同助手黃寶慧係董事，唔開會又唔交財務報表，仲話亞視依家仲欠佢二千三百萬元未還，原來筆錢係佢喺○九年底買咗亞視發行嘅可換股債券，但亞視收咗錢後就一直未有發出可換股債券畀佢。亞視發言人就話，因為蔡衍明早前唔滿意可換股債券價錢而入稟法院凍結咗筆錢，所以亞視先還唔到錢畀佢。

另外，亞視新聞部不滿財經節目《走進上市公司》及《理財博客》主持人殷莉，攞住個主播同首席財經記者銜頭走去做廣告性質嘅節目，仲打算剪輯部分內容喺新聞節目度播放。殷莉尋日出來澄清時，就畀亞視記者一邊拎住個電話一邊質問，好似有人喺電話教路咁，個記者質疑殷莉以新聞從業員身份去拉廣告係違反新聞專業操守，最終逼到殷莉激動落淚，聲言自己係以一個傳媒人去做嘢。廣管局就話，根據《電視通用業務守則》，新聞節目不得接受贊助，否則便屬違規。