政壇:搞搞政:徐立之救火 陳智思抽水
日前港大百周年校慶典禮嘅保安安排搞到一鑊泡,有示威嘅學生同校友慘被警方推倒同禁錮,校長徐立之成為眾矢之的,雖然佢事發後多次發聲明認衰,但仍被封為「聲明校長」,仲有人叫佢落台添!嶺南大學校董會主席Bernard陳智思就教精徐立之,話依家嘅社會氣氛,每逢舉辦有政要出席嘅盛大活動,就要預咗有人踩場,仲要處理得妥妥當當。
要為示威做好準備
Bernard認為本地院校會借鑑今次港大事件,當邀請政要出席活動時亦要為可能發生嘅示威做好準備,例如要顧及貴賓感受之餘,亦要畀示威者有機會表達訴求,包括要搵人接收請願信,總之要力求順得哥情又不失嫂意。
但佢亦語帶同情話徐立之嘅處境好艱難,事關有政要出席嘅活動,保安措施冇可能由校方完全主導,所以事前同警方嘅協調就好重要嘞!
設計圖片及對白