政壇：工專聯爆內鬥

手握立法會十二票嘅「工商專業聯盟」日前大鑼大鼓成立，表面就話團結商界力量向政府反映意見，其實暗地裏卻暗戰連場。據聞，富貴黨同總商會代表林健鋒等四人退黨另起爐灶嘅經濟動力肯破鏡重圓，一切都係利字行頭，但講到選舉層面依然冇面畀，至少有兩個功能組別好有機會「鬼打鬼」，睇嚟兩黨嘅「假和諧」維持唔得幾耐，正面衝突更可能一觸即發。

傾唔掂數就自行參選

據聞，富貴黨願意放低同經濟動力嘅恩怨，主要係垂涎「超級區議會」議席嘅入場券，因為該黨預料單打獨鬥未必可以喺區議會選舉贏得十五席，如果有聯盟做靠山自然水到渠成；經濟動力亦都唔會做冇着數嘅生意，同富貴黨企埋就可以免卻林健鋒等人受到挑戰狙擊。

不過，其他功能組別就冇咁好彩喇。據聞除咗旅遊界有望傾掂數共推代表同謝偉俊一決高下，富貴黨同經濟動力喺紡織界同飲食界都企硬有心儀參選人，據聞有人講到明會同聯盟保持距離，一旦傾唔掂數就自行參選，聯盟要是但勸退一邊都唔容易。

備受富貴黨力捧嘅Felix鍾國斌上屆以獨立身份參選紡織及製衣界，都只係輸「蘇菲」梁劉柔芬幾百票，幾年嚟佢為業界奔走發聲，兼且業界早有求變嘅聲音，倘若明年再度參選絕對有力同蘇菲一拚。

至於飲食界方面，「廿蚊張」張宇人同香港餐飲聯業協會會長黃家和都勢均力敵，前者喺最低工資發表廿蚊言論雖然受到各界狠批，但堅定維護業界立場獲得業界讚揚，黃家和喺過去多年亦密密為業界奔走發聲，深信自己有一定嘅勝算。

究竟最後兩黨點安撫自己友，避免更多擦槍走火嘅情況出現呢？咁就要拭目以待喇！