新世界集團贊助喺十月十六日復辦維港渡海泳，集團主席鄭裕彤長孫Adrian鄭志剛尋日就代表公司出席活動發布會，佢話維港渡海泳係一項歷史悠久嘅比賽，屬於港人嘅集體回憶，又自爆喺小學嘅時候參加過學校嘅游泳比賽，仲攞咗個全校游泳比賽冠軍添！
Adrian又話依家一得閒就會去游水，但被問到會否參加今年維港渡海泳比賽時，佢就耍手擰頭，話渡海泳同喺泳池游水唔同，因為渡海泳係一個考驗體力同勇氣嘅運動，而且今次大會仲非常嚴格，要求參賽者水試合格後先可以參加比賽，所以佢今年唔會參加住喎。
雖然鄭志剛都係游泳健將，但因渡海泳參賽要求好嚴格，所以佢今年唔參賽嘞！
