政壇：搞搞政：教協買物業圓華叔心願

比起其他泛民工會，教協可以話係隱形富戶。近日教協再次重錘出擊，一次過畀五千萬元豪買新會址，作擴充之用。前會長司徒華生前時講過，希望教協再買新基地，準備長期抗戰，今次教協都算還華叔心願。教協會長馮偉華話今次聽足華叔「寧買不租」嘅吩咐，費事畀業主鍊住條頸不斷加租。教協喺山東街好望角大廈已經有兩層物業做會址，今次佢哋喺同一條街嘅中僑商業大廈買咗全層，佔地成六千二百幾呎。雖然大拿拿畀咗五千萬元出嚟，但副會長張文光話教協仲有錢剩，只要遇到啱心水，就會繼續買會址。講到好似玩大富翁咁，教協理財確係有一手。

馮偉華話現有會址所有行政人員同辦公室，會全部搬入對面嘅新會址，新會址除咗行政用途外，亦有教師培訓等發展中心，第日教協開會商討大計時都喺呢度，變成教協新嘅心戰室。

至於舊有嘅兩層會址就會全部擴充為福利部，依家教協福利部已經乜都有得賣，其實係團購嘅開山祖師。張文仲話，總之第日擴充後，希望做到「所有教師鍾意嘅同需要嘅，都有得賣」。