政壇：唔玩工專聯五散人怕綁「票」

由經濟動力嘅林健鋒牽頭，包括富貴黨、專業會議同中總代表等十二名議員組成嘅工商專業聯盟，話要結合工商同專業界嘅力量，但偏偏唔見咗手執五票嘅立法會「五散人」。有啲蹺蹊喎！

記者尋日同散人之一、立法會保險界代表陳健波講開新成立嘅工專聯，佢話實情林健鋒由○八年已經想拉攏包括佢在內嘅獨立人士，當時佢就同另一散人林大輝講，佢哋再唔一齊，自己就另嫁他人啦！結果就如大家所見。

陳健波細仔見識劏房

回憶當初，陳健波不諱言由Day 1開始就同大輝比較投契，及後大輝成立C18，佢順理成章擔任顧問。雖然散人自成一國，但佢透露林健鋒不時有再游說佢，只係佢有感一旦加入工專聯，投票時難免有啲壓力，況且佢認為依家散人繼續我行我素，佢哋喺關鍵時候自然變得更加重要，發揮關鍵少數，所以佢更享受依家嘅狀態。講白啲，佢無非係唔想被綑綁投票啫！

講講吓，佢又慨嘆有時作為建制派，真係好想政府做對事，唔使佢哋難做。佢舉例預算案跪低派六千蚊咁，雖則唔少市民受惠於派錢會好開心，但係最初話唔派，後來又派，咁兩極咪盞令市民對政府失去信心，更甚係政府成日冇問清楚大家意見就做錯決定，結果咪難為咗建制派囉。難怪佢忍唔住要問政府「你醒啲好唔好？」

施政要貼近民意好重要，為咗令佢即將入大學嘅細仔多啲了解社會，原來佢拜託咗建仔嘅立法會議員李慧琼，安排細仔微服去深水埗區議員鄭泳舜辦事處返一個星期工，事前鄭泳舜全不知情。最終佢細仔見識到劏房、長者院舍同落區有乜嘢要做，對社會實況有更深刻嘅體會。