CULTURE噏：文學online

著名作家畢明與80後網絡女作家車人，交流分享對網絡文學興起的看法。

香港一直被批評為文化沙漠，與出版成本高昂、青少年難以投身寫作界有一定關係，但近年愈來愈多青年透過網上發揮創意，上載文章，形成一股網絡文學新勢力，部分網絡作家更吸引出版社注意，獲投資出書，令文化沙漠大有機會變成文化綠洲！著名作家兼創作網站創辦人畢明指出，互聯網普及，令市民有機會一圓「作家夢」。今次便找來80後網絡女作家車人，分享她對網絡文學興起的看法。

我由細到大都好鍾意寫作，由小學開始，就不斷向校報、報紙、雜誌投稿，亦參加過好多唔同機構舉辦嘅寫作比賽，不過好多文章寄出後，都無乜機會刊登，就算到依家，可以畀市民投稿、發表文章嘅渠道仍然好少，而且限制多多。以寫作比賽為例，我哋要等到有比賽先可以寫，作品題材及字數都受到主辦單位規限，好難發揮。

幾十年前，好多報紙雜誌都接受市民投稿，孕育咗好多出色作家，但係呢啲投稿嘅地方近年所餘無幾，市民就算有idea，想寫小說，都好難「面世」。直至近年，開始有市民喺創作網站、blog或者討論區發表文章，藉此滿足佢哋嘅「寫作欲」，慢慢形成所謂嘅網絡文學。

我都係○三年喺網上睇到「原創空間」，於是喺嗰度發表文章，亦慢慢有網民留意到我嘅作品。身為作家，當然希望有好多讀者，有好多人欣賞，相比之前投稿毫無回音，依家喺網上發表文章，令我得到更多滿足感，獲得寫作動力。

網絡文學喺其他地方已經出現咗一段時間，好似內地同台灣，都係網絡文學發展得較成熟嘅地方，而喺香港就日漸普及，以我嘅網站為例，高峰時期，每個月會收到五、六百篇文章，瀏覽人次更加有十萬以上。

網絡文學仲有唔少比傳統文學好嘅地方。首先，我哋可以喺有靈感嘅時候，隨時隨地寫文章及上載發表，而且作者同讀者之間嘅互動性大好多，作者可以即時睇到讀者嘅comment，從而改善。另外，我哋可以喺唔同時候為舊嘅故事加入新元素，令到故事唔會過時。

其實香港肯定有好多具創意嘅作家，只係一直苦無途徑。網絡文學興起，提供多一個平台畀市民寫作，令到文化界百花齊放，對香港嘅寫作界嚟講，肯定係一件好事。

受訪者檔案

車人（筆名）：80後網絡小說女作家，任職金融業，○三年起於網上投稿，至○八年獲出版社賞識，出版第一本個人愛情小說。

畢明（筆名）：香港著名驚慄小說作家，曾出版十多本大受歡迎的小說，現時積極推動青少年創作，於○一年與友人創立「原創空間」，讓市民於網上發表文章，現為「原創空間」總編輯。

culture@on.cc